Академиялық ұтқырлық бағдарламасын жүзеге асыру аясында «Bolashaq» Академиясының студенттері тәжірибе алмасу, басқа елдің білім беру жүйесімен танысу және кәсіби құзыреттіліктерін арттыру мақсатында Ресей Федерациясының Новосибирск мемлекеттік педагогикалық университетіне (НМПУ) аттанды.
Студенттер алғашқы күндерден бастап қабылдаушы университеттің білім беру және мәдени өміріне белсенді араласа бастады. Новосибирск мемлекеттік педагогикалық университетінің өкілдері олар үшін университет аумағына таныстыру экскурсиясын ұйымдастырып, оқу орнының инфрақұрылымымен, білім беру ортасымен және оқу үдерісін ұйымдастыру ерекшеліктерімен таныстырды.
Бағдарлама аясында Ресей Федерациясының мектептегі білім беру жүйесін зерттеуге ерекше көңіл бөлінуде. Студенттер Новосибирск қаласындағы түрлі білім беру мекемелеріне, соның ішінде гимназиялар мен лицейлерге барып, сабақтарға қатысу, заманауи педагогикалық әдіс-тәсілдерді зерделеу және ресейлік мұғалімдердің практикалық тәжірибесімен танысу мүмкіндігіне ие болуда.
Алғашқы болып барған білім беру мекемелерінің бірі — Кольцово ғылым қалашығында орналасқан лицей. Студенттер үшін оқу орны бойынша экскурсия ұйымдастырылып, одан кейін олар екі сабаққа бақылаушы ретінде қатысты. Бұл тәжірибе оларға оқу үдерісінің ұйымдастырылуын, оқыту әдістемелерін және мұғалімдер мен оқушылар арасындағы өзара қарым-қатынас ерекшеліктерін жақынырақ зерттеуге мүмкіндік берді.
Академиялық ұтқырлық бағдарламасы тек білім беру іс-шараларымен шектелмей, мәдени-танымдық бағыттарды да қамтиды. Студенттер Новосибирск қаласының орталығын аралап, мұражай мен қалалық саябақтарға барып, қаланың көрікті жерлерімен және мәдени өмірімен танысты. Сонымен қатар қабылдаушы тарап студенттердің жаңа ортаға бейімделуіне, мәдениетаралық қарым-қатынас орнатуына және өзара тәжірибе алмасуына ықпал ететін сабақтан тыс іс-шаралар ұйымдастыруда.
Алдағы күндері Новосибирск қаласындағы басқа да гимназиялар мен лицейлерге бару, оқу сабақтарын бақылау, педагогикалық тәжірибелермен танысу және түрлі білім беру іс-шараларына қатысу жоспарланған.
Академиялық ұтқырлық бағдарламасына қатысу «Bolashaq» Академиясының студенттері үшін кәсіби және тұлғалық дамудың жаңа мүмкіндіктерін ашады. Мұндай халықаралық тәжірибе болашақ мамандардың мәдениетаралық құзыреттіліктерін қалыптастыруға, педагогикалық дүниетанымын кеңейтуге және Қазақстан мен Ресейдің білім беру мекемелері арасындағы ынтымақтастықты нығайтуға ықпал етеді.
«Bolashaq» Академиясы халықаралық академиялық ынтымақтастықты дамытуды жалғастырып, студенттердің құнды білім беру тәжірибесін жинақтауына және кәсіби әлеуетін арттыруына қолайлы жағдай жасауда.
