«Bolashaq» Академиясында дәстүрлі «Тіл-Қазына» олимпиадасы өтті.
2026 жылғы 23 сәуір күні «Bolashaq» Академиясының «Қазақ тілі мен әдебиеті» кафедрасы Қарағанды облысы мен Қарағанды қаласының мектеп, лицей және гимназияларының 11-сынып оқушылары арасында дәстүрлі «Тіл-Қазына» олимпиадасын жоғары деңгейде ұйымдастырды.
Олимпиаданың мақсаты мен маңызы:
Биылғы білім додасының негізгі мақсаты – өскелең ұрпақтың ана тіліміз бен ұлттық әдебиетімізге деген сүйіспеншілігін арттыру, оқушылардың білім деңгейін саралап, дарынды жастарды анықтау және оларға болашақ мамандық таңдауда қолдау көрсету.
Мұғалімдерге арналған әдістемелік семинар:
Олимпиада аясында тек оқушылар емес, пән мұғалімдері де кәсіби біліктіліктерін арттырды. Ұстаздар қауымына арналған «Тіл мен әдебиет сабағында ЖИ-ді (жасанды интеллект) қолданудың тиімді жолдары мен әдістері» атты практикалық семинар өткізілді.
Заманауи технологияларды білім беру процесіне енгізу жолдары талқыланған жиын соңында қатысушы мұғалімдерге арнайы сертификаттар табысталды.
Сайыс кезеңдері:
Биылғы олимпиадаға қатысуға 47 оқушы ниет білдіріп, оның ішінен 41 үміткер бақ сынады. Сайыс екі кезеңнен тұрды:
- І кезең: Қазақ тілі мен әдебиеті пәндері бойынша күрделі тест тапсырмалары.
- ІІ кезең: Тест қорытындысы бойынша озық шыққан 16 оқушы қазақтың дауылпаз ақыны Қасым Аманжоловтың өлеңдерін жатқа оқып, мәнерлеп оқу шеберлігін паш етті.
Жеңімпаздар мен марапаттар:
Қазылар алқасының шешімімен оқушылардың білімі мен өнері сараланып, Академия гранттары мен жеңілдіктеріне ие болды:
- 1-орын: Рымбай Шұғыла Айбекқызы – «Bolashaq» академиясында 1 жыл тегін оқу мүмкіндігін (100% жеңілдік) иеленді.
- 2-орын: Сатанова Жансая Толеубековна – 1 жылдық оқу ақысына 50% жеңілдік алды.
- 3-орын: Жуманова Жания Адебиетовна – 1 жылдық оқу ақысына 25% жеңілдік алды.
«Тіл-Қазына» дәстүрлі пәндік олимпиадасы оқушылардың шығармашылық қабілетін ұштап, көркемсөз оқу шеберлігін шыңдауға үлкен септігін тигізді. «Bolashaq» Академиясы жас таланттарды қолдау дәстүрін алдағы уақытта да жалғастыра бермек.
Барлық қатысушыларға сәт сапар және биік белестер тілейміз!
