Академик Е.А. Бөкетов атындағы Қарағанды зерттеу университетінің Филология факультетінде «Мағжан оқулары» өтті.
Филология факультетінің «Қазақ тілінің практикалық курсы» кафедрасы ұйымдастырған дәстүрлі «Мағжан оқулары» аясында «Мағжанның маржан жырлары» аймақтық байқауы табысты өтті.
Іс-шараға жоғары оқу орындарының студенттері мен жалпы білім беретін мектеп оқушылары белсенді қатысты. Байқаудың мақсаты – қазақ поэзиясының жарық жұлдызы, ұлы ақын Мағжан Жұмабаевтың шығармашылығын насихаттау және жас ұрпақтың рухани дамуына ықпал ету.
Байқауға біздің академиямыздың «Қазақ тілі мен әдебиеті» білім беру бағдарламасының 4-курс студенті Шари Қымбат қатысып, өзінің әдебиетке деген шынайы қызығушылығы мен шығармашылық қабілетін көрсетті. Жетекшісі: кафедра доценті Р.Н.Исмаилова.
Байқаудың өткізілу тәртібі:
Іс-шара сайыс түрінде өтті және екі кезеңнен тұрды. Алғашқы кезеңде жоғары ұпай жинаған қатысушылар екінші кезеңге өтті.
- I Кезең: “Таза, терең, өткір, күшті, кең тілім!”
Қатысушылар Мағжан Жұмабаевтың үш өлеңін таңдап, оларды жатқа және мәнерлеп оқыды. Әрбір өнерпаздың оқылым мәнері мен дауыс ырғағы әділқазылар тарапынан жоғары бағаланды.
https://youtu.be/7w8tiXA9GdEhttps://www.youtube.com/embed/7w8tiXA9GdE?feature=oembed
- II Кезең: “Мен жастарға сенемін!”
Екінші кезеңде қатысушылар сахналық көрсетілім арқылы өз шығармашылық қабілеттерін танытты. Мағжан бейнесін сомдау, оның өмірі мен шығармашылығын көркем түрде жеткізу – бұл кезеңнің басты ерекшелігі болды.
Байқау қатысушыларға поэзия әлемінде жаңаша серпіліс беріп, олардың шығармашылық әлеуетін ашуға үлкен мүмкіндік жасады. Шари Қымбат байқаудағы ерекше өнерімен көзге түсіп, ақын шығармаларына деген терең сүйіспеншілігін дәлелдеп, І дәрежелі дипломмен, жетекшісі Алғыс хатпен марапатталды.
Мағжан Жұмабаевтың жарқын бейнесі мен өшпес жырлары жас ұрпақтың жүрегінде мәңгі сақталады!
