2025-2026 оқу жылынан бастап «Bolashaq» Академиясы 6B10101 – «Фармация» білім беру бағдарламасы үшін студенттердің теориялық дайындығын фармацевтика саласындағы дәріханаларда практикалық тәжірибемен біріктіруге бағытталған дуальды оқыту моделі іске асырылуда.
Бұл модельді әзірлеудің маңызды кезеңдерінің бірі студенттер, «Bolashaq» Академиясы және «Биосфера» дәріхана желісінің құрамына кіретін стейкхолдерлер, жұмыс берушілер – «Долголет» ЖШС және «ФОРМАТ.KZ» ЖШС дәріханалары арасында үш жақты дуальды оқыту туралы келісімдердің жасалуы болды. Бұл келісімдер Жоғары және (немесе) жоғары оқу орнынан кейінгі білім беру ұйымдарында дуальды оқытуды ұйымдастыру қағидаларына, сондай-ақ Қазақстан Республикасының Еңбек кодексіне сәйкес әзірленді. Бұл модель бойынша «Фармация» білім беру бағдарламасы бойынша студенттер нақты өмірдегі фармацевтикалық тәжірибеде кәсіби құзыреттіліктерді дамытады, ал серіктес компаниялар жұмыс орнында оқыту және кәсіби тағылымдамадан өту үшін жұмыс орындарын ұсынады.
Бұл дуальды оқыту барысында студенттер «Тиісті фармацевтикалық тәжірибе», «Фармацевтикалық персоналды басқару», «Фармацевтикалық кеңес беру және қамқорлық», «Фармацевтикалық қызметті ұйымдастыру» және «Коммуникативті дағдылар» пәндерін оқиды, сондай-ақ жұмыс орнында өндірістік практикадан өтеді. Дәріхана мекемелерінде олар дәріхана жұмысының ұйымдастырылуымен, дәрілік заттарды сақтау және тарату ережелерімен, фармацевтикалық кеңес беру ерекшеліктерімен, дәрілердің сапасы мен қауіпсіздігі талаптарымен танысады. Бұл оқыту форматы түлектерге теориялық білімдерін практикалық тәжірибе арқылы бекітуге, кәсіби тәжірибе жинауға және бәсекеге қабілеттілігін арттыруға мүмкіндік береді. Бұл формат сонымен қатар жұмыс берушілерге болашақ мамандардың кадрлар резервін қалыптастыруға көмектеседі.
Компаниялар студенттерді қажетті жұмыс жағдайларымен, оқу құралдарымен және шығын материалдарымен қамтамасыз етеді, сондай-ақ міндетті түрде еңбекті қорғау және қауіпсіздік бойынша нұсқамалықтар өткізеді. Дуальды оқытудың маңызды элементі – жұмыс берушілердің білім беру бағдарламаларын әзірлеуге және жаңартуға қатысуы, семинарлар мен практикалық жұмыстарға тақырыптар ұсынуы және компания өкілдерінің студенттердің қорытынды аттестаттауына қатысуы.
Дуальды оқыту «Bolashaq» Академиясының фармацевтикалық пәндер кафедрасының белсенді қатысуымен жүзеге асырылады, ол жұмыс оқу жоспарларын әзірлеуді үйлестіреді, студенттердің практикалық дайындығын бақылайды және компания тәлімгерлеріне әдістемелік қолдау көрсетеді.
«Фармация» білім беру бағдарламасына арналған дуальды оқыту моделін енгізу тәжірибеге бағытталған білім беруді дамытуға ықпал етеді, білім беру мен фармацевтика өнеркәсібі арасындағы ынтымақтастықты нығайтады және Қазақстан Республикасының денсаулық сақтау жүйесі үшін бәсекеге қабілетті мамандарды даярлайды.
